უკრაინული ტელევიზია "INTV" შინაგანმა ჯარებმა დაიკავა. ამის შესახებ უკრაინული სააგენტოები იუწყებიან. "INTV" მთავრობის მიმართ კრიტიკულად განწყობილი ტელევიზიაა, რომელიც აქციებს უწყვეტ რეჟიმში გადასცემდა.

უკრაინის ერთ-ერთი ტელევიზიის ინფორმაციით, მეტროს სადგურებში 3000-მდე სპეცრაზმელია მობილიზებული, რომლებსაც ევრომეიდნის გაწმენდის დავალება აქვთ მიღებული.

გარდა ამისა, ოპოზიციური პარტია "ბატკივშინაში" აცხადებენ, რომ სპეცრაზმმა მათი ოფისი გაძარცვა. პარტიის პრესსამსახურის ინფორმაციით , ოფისში "ბერკუტის" დაახლოებით 100 წარმომადგენელი შეიჭრა. ისინი ავტომატებით იყვნენ შეიარაღებულები და სახეზე ნიღბები ეკეთათ. 
პარტიის წევრებმა რამდენჯერმე მილიციაც გამოიძახეს, თუმცა ისინი არც ერთ ჯერზე არ გამოცხადდნენ. როგორც პარტიაში აღნიშნავენ, მოგვიანებით "ბერკუტის" თანამშრომლებმა ოფისიდან სერვერები წაიღეს და წავიდნენ. 

"ვერავითარი დოკუმენტები, ვერავითარი ინფორმაცია, თუ ვინ გასცა პარტიის ოფისის შტურმით აღების ბრძანება, ვერ მივიღეთ", - ნათქვამია პარტიის განცხადებაში.

ოპოზიციის ლიდერების განცხადებით, ხელისუფლება დღეს ღამე სამთავრობო კვარტალში სპეცოპერაციის ჩატარებას გეგმავს. მათი თქმით, ელექტროენერგია შეწყდება და სპეცოპერაცია მოულოდნელად დაიწყება.

შეგახსენებთ, რომ დღეს აქციების გამართვის ვადა იწურება, თუმცა აქციის მონაწილეები დაშლას არ აპირებენ.

 ევრომეიდანზე შინაგანმა ჯარმა კარვების დაშლა 19:00 საათიდან დაიწყო.