ბათუმის მერის ჯემალ ანანიძის განცხადებით, მახინჯაურიდან დაწყებული, ბათუმის ცენტრალური ქუჩების ჩათვლით, 30 ქუჩა გაიწმინდა. ანანიძის თქმით, თუ ამინდი არ გაუარესდა, დღის ბოლომდე ქალაქში სატრანსპორტო საშუალების მოძრაობა სრულად აღდგება.

„მთელი ღამის განმავლობაში ტექნიკა რუსთაველის ქუჩის გაწმენდაზე მუშაობდა. ჩვენ პრობლემები შეგვექმნა იმ ქუჩებზე, რომლებიც ქვაფენილებითაა მოწყობილი. ტექნიკა ქვაფენილებს აზიანებს, ამიტომ მერიის სამსახურები ნიჩბებით წმენდენ, ასევე ასეთ ქუჩებზე გამოვიყენეთ ტექნიკური მარილი. მოსახლეობას მოვუწოდებთ, თუ აუცილებლობა არაა თავიანთი სატრანსპორტო საშუალებებით ნუ გადაადგილდებიან", - აღნიშნა ჯემალ ანანიძემ.