„ჯერჯერობით ხელფასების და პენსიების გადაუხდელობის საშიშროება არ არსებობს", - ამის შესახებ ექსპერტმა ეკონომიკის საკითხებში დემურ გიორხელიძემ, დღეს „რეპორტიორში" გამართულ „პრესკონფერენციაზე" განაცხადა.

გიორხელიძემ 2013 წელს, ქვეყანაში მიმდინარე ეკონომიკურ დეფიციტზე ისაუბრა. ის თვლის, რომ 2,5%-იანი ეკონომიკური ზრდა  საქართველოსთვის საშიშია.

„2013 წლის ბიუჯეტი, იმის გამო, რომ დაგეგმილი 6%-ის ნაცვლად ვერ ასცდება 2,5%-ს, ცხადია ვერ მიიღებს დაგეგმილ შემოსავლებს და ბუნებრივია, შესაბამისი ხარჯებით ვერ იქნება დაფარული. ეს ჯერჯერობით არ შეეხება ხელფასებს და პენსიებს, რადგან მათი გადაუხდელობის საშიშროება დღეს არ არსებობს. მართალია  2,5%-იანი ეკონომიკური ზრდა იქნება სავარაუდოდ, თუმცა ზრდის მაჩვენებელი ამ დროისთვის 1,9%-ია. მართალია ზრდა არის, მაგრამ საშიშად მცირეა. ჩვენ რომ გვქონდეს დიდი ეკონომიკა, მაშინ ნორმალური იქნებოდა, მაგრამ იმდენად მიზერული ეკონომიკა გვაქვს, მაჩვენებელი საშიშია", - განაცხადა დემურ გიორხელიძემ.