ჩინეთის სახალხო რესპუბლიკის მთავრობის მიერ გრანტის სახით საქართველოსთვის დაახლოებით 4.9 მლნ აშშ დოლარი გამოიყოფა -აღნიშნულ შეთანხმებას ფინანსთა სამინისტროში მინისტრმა ნოდარ ხადურმა და ჩინეთის სახალხო რესპუბლიკის საგანგებო და სრულუფლებიან ელჩმა საქართველოში იუე ბინმა მოაწერეს ხელი.

მხარეებმა ქვეყნებს შორის სავაჭრო-ეკონომიკურ ურთიერთობებზეც ისაუბრეს.

„აღნიშნული გრანტით დაფინანსდება საქართველოსთვის პრიორიტეტული ეკონომიკური და ტექნიკური თანამშრომლობის პროექტები. ბოლო პერიოდის განმავლობაში საქართველომ ჩინეთის მთავრობისგან 220 მლნ იუანის ოდენობის დახმარება მიიღო, მათ შორის, მნიშვნელოვანი იყო მელიორაციისა და ირიგაციის სისტემებისთვის განკუთვნილი ტექნიკის გადმოცემა. დარწმუნებული ვარ, ორ ქვეყანას შორის თანამშრომლობა კვლავ გაგრძელდება", - განაცხადა ფინანსთა მინისტრმა ნოდარ ხადურმა. 

ჩინეთის ელჩის განცხადებით, ორმხრივი ურთიერთობების განვითარებისთვის დღევანდელ ღონისძიებას დიდი მნიშვნელობა აქვს.

„დიპლომატიური ურთიერთობების 21 წლის მანძილზე ჩინეთ-საქართველოს ურთიერთობები სტაბილურად და ჯანსაღად ვითარდება. განსაკუთრებით დიდი წარმატებები გვაქვს ეკონომიკური თანამშრომლობის მხრივ. იმედი გვაქვს, ჩვენს წვლილს შევიტანთ საქართველოს ეკონომიკის განვითარებაში", - განაცხადა ჩინეთის სახალხო რესპუბლიკის საგანგებო და სრულუფლებიანმა ელჩმა საქართველოში იუე ბინმა.

2005 წლიდან დღემდე ჩინეთის სახალხო რესპუბლიკის მთავრობის მიერ საქართველოსთვის გრანტების სახით უკვე გამოყოფილია 220 მლნ იუანი (დაახლოებით 36.2 მლნ აშშ დოლარი) და 30 მლნ იუანის (დაახლოებით 4.7 მლნ აშშ დოლარი) ოდენობის 20-წლიანი უპროცენტო სასაქონლო კრედიტი 10-წლიანი შეღავათიანი პერიოდით. 

აღნიშნული ფინანსური მხარდაჭერით განხორციელდა და ამჟამადაც მიმდინარეობს ფინანსთა სამინისტროს შემოსავლების სამსახურის, ასევე საქართველოს სოფლის მეურნეობის მნიშვნელოვანი დარგების აღჭურვა შესაბამისი ტექნიკითა და მოწყობილობებით.