საქართველოს მართმადიდებელი ეკლესია დღეს წმინდა მოწამეების კვირიკესა და ივლიტას ხსენების დღეს აღნიშნავს. წმინდა მოწამეები მცირე აზიაში ქალაქ იკონიაში ცხოვრობდნენ, თუმცა როდესაც იმპერატორმა დიოკლეტიანემ ქრისტიანების დევნა დაიწყო, დედა-შვილი ქალაქს გაერიდა. მოგვიანებით, მათ მაინც მიაგნეს და იმპერატორის წინაშე სამსჯავროზე გაიყვანეს. დედა-შვილმა ქრისტიანობა არ უარყო, რის შემდეგაც, მცირეწლოვანი ვაჟი კვირიკე კიბეზე დააგორეს, ივლიტას კი თავი მოჰკვეთეს. წმინდანებს მორწმუნეები ოჯახური ბედნიერების და სნეულ ყრმათა განკურნებისთვის ევედრებიან. წმინდანებს - კვირიკესა და ივლიტას განსაკუთრებით სვანეთში სცემენ თაყვანს, სადაც ამ დღეს სახალხო დღესასწაული ლიგურკე იმართება.