„ნაციონალური მოძრაობა" პარტიის მართვისა და შიდა დემოკრატიის გაძლიერების კუთხით მნიშვნელოვანი ცვლილებების განსახორციელებლად ემზადება. ამის შესახებ საპარლამენტო უმცირესობის წევრმა ირმა ნადირაშვილმა დღევანდელ ბრიფინგზე განაცხადა. დეპუტატმა „ნაციონალური მოძრაობის" პრაიმერიზის შედეგები შეაჯამა და აღნიშნა, რომ ეს იყო აბსოლუტურად ახალი სიტყვა ქართულ პოლიტიკაში. „დღემდე ასეთი ფორმით საქართველოში საპრეზიდენტო კანდიდატის გამოვლენა არ მომხდარა. თუმცა, ეს არ იქნება პირველი და უკანასკნელი ნაბიჯი. პარტია შიდა დემოკრატიის და პარტიის მართვის კუთხით სერიოზული ცვლილებების განსახორციელებლად ემზადება", - განაცხადა ნადირაშვილმა და აღნიშნა, რომ ამის შესახებ საზოგადოება უახლოეს მომავალში შეიტყობს. მისი თქმით, „ნაციონალური მოძრაობის" სახელით პრეზიდენტის პოსტის დასაკავებლად დავით ბაქრაძე იბრძოლებს. ირმა ნადირაშვილმა ზუგდიდსა და თბილისში პრაიმერიზის თანმხლებ ექსცესებზეც ისაუბრა და აღნიშნა, რომ „ხელისუფლების მცდელობების" მიუხედავად, პროცესი შეუფერხებლად და გამჭვირვალედ ჩატარდა.
