კულუარული ინფორმაციით, ჟვანიას საქმეში უკვე არსებობს მთავარი მოწმე, რომელიც ჰყვება, თუ როგორ და რა ვითარებაში მოკლეს ზურაბ ჟვანია. შესაძლოა, გამოძიებისთვის ამ საკითხთან დაკავშირებული მნიშვნელოვანი ინფორმაცია ყოფილი პრემიერის დაცვის ყოფილ უფროსს, კობა ხარშილაძესაც მიეწოდებინა. ყოფილი პრემიერ-მინისტრის გარემოცვა ამბობს, რომ ჟვანიას ცხედარს ძალადობის კვალი ემჩნეოდა. „კვირის პალიტრასთან" ინტერვიუში ზურაბ ჟვანიას ყოფილი თანაგუნდელი ხათუნა ხოფერია აცხადებს, რომ ხარშილაძემ პროკურატურას მნიშვნელოვანი ინფორმაცია მიაწოდა.
„ჩემი აზრით, კობა ხარშილაძემ პროკურატურას მნიშვნელოვანი ინფორმაცია მიაწოდა. ამჯერად ის გასცემდა პასუხს კითხვას, რატომ ჰქონდა ზურას ტუჩთან ღრმა ნაჭდევი. თავის დროზე ხარშილაძემ თქვა, რომ მან გაზით გაგუდულ პრემიერს ხელოვნური სუნთქვა ჩაუტარა გონზე მოსაყვანად. გამორიცხულია, ასეთი დაზიანება ადამიანს ხელოვნური სუნთქვის ჩატარების გამო მიეღო. ხარშილაძეს ბევრი რამის გამო მოუწევს პასუხისგება, სულ ცოტა, იმ სამსახურებრივი გულგრილობისთვის, რაც გამოიჩინა. ის ვალდებული იყო პრემიერ-მინისტრის სიცოცხლე და უსაფრთხოება დაეცვა. საკუთარი თვალით მაქვს ნანახი, ცხედარს კეფაზე, მარჯვენა მხარეს, ნატყვიარივით დიდი ჭრილობა ჰქონდა, რომელსაც სქელ ფენად გრიმი ედო. როცა ვკითხეთ ოფიციალურ პირებს მიზეზი, გვითხრეს, ეს უხეშად ჩატარებული ტრეპანაციის შედეგიაო",- აცხადებს პრემიერის ყოფილი თანაგუნდელი.
მოამზადა ლილუ მიროტაძემ
