საპარლამენტო უმრავლეოსობის წევრი ელისო ჩაფიძე საერთაშორისო და ადგილობრივ ორგანიზაციებს მოუწოდებს, ტელეკომპანია "ტვ 3"-ის განცხადებაზე შესაბამისი რეაგირება მოახდინონ.

ელისო ჩაფიძის განცხადებით, იმედია, ტელეკომპანიის წარმომადგენელთა განცხადება, "ნაციონალური მოძრაობის" მხრიდან განხორციელებული ზეწოლის შესახებ, გამოძიებული იქნება.

"როგორც "ქართული ოცნების" წარმომადგენელი, ვგმობ ყოველგვარ ზეწოლას თავისუფალ მედიასაშუალებებზე და იმედი მაქვს, რომ ტელეკომპანია "ტვ 3"-ის წარმომადგენლების განცხადება იქნება გამოძიებული. ჩვენ მრავალი ნაბიჯი გადავდგით ერთი წლის განმავლობაში ქართული ტელესივრცის გასათავისუფლებლად, რომელიმე პოლიტიკური პარტიის მხრიდან ზეწოლის აღსაკვეთად. მნიშვნელოვან ნაბიჯებს ვდგამთ ასევე საზოგადოებრივი მაუწყებლის დამოუკიდებლობისათვის. გაიზარდა საჯარო ინფორმაციის გაცემის მონაცემები და შემცირდა თავისუფალ მედიაზე ზეწოლის შემთხვევები. თუმცა "ნაციონალური მოძრაობისგან", რომლებიც ხელისფლებაში ყოფნის დროს ტელეკომპანიებს უვარდებოდნენ ეთერში, არბევდნენ და ხურავდნენ, ნამდვილად არ მიკვირს მსგავსი ნაბიჯების გადადგმა. ვფიქრობ, ზეწოლა დაკავშირებული უნდა იყოს იმ ჟურნალისტურ გამოძიებებთან, რომლებიც ამ არხზე გადაიცემა. აქედან გამომდინარე, მოვუწოდებ როგორც საქართველოში მოქმედ, ასევე საერთაშორისო არასამთავრობო ორგანიზაციებს, ყურად იღონ და შესაბამისი რეაგირება მოახდინონ "ტვ-3"-ზე ზეწოლის ფაქტებზე",-განაცხადა ჩაფიძემ.