პარლამენტში ამჯერად "ნორმატიული აქტების შესახებ" კანონპროექტზე დადებული ვეტო 92 ხმით გადალახეს. კანონში განხორციელებული ცვლილებებით, აფხაზეთის ავტონომიური რესპუბლიკის უმაღლესი საბჭოს მიერ კანონპროექტის მიღების, აფხაზეთის მთავრობის თავმჯდომარის მიერ მისი ხელმოწერის და გამოქვეყნების წესი რეგულირდება. როგორც მმართველ გუნდში განმარტავენ, ამ თვალსაზრისით აფხაზეთის უმაღლესი საბჭოს სამართლებრივი ბაზა პრობლემატურია, უმაღლესი საბჭო გადაწყვეტილებას ვერ იღებს. პრეზიდენტის შეფასებით კი, პარლამენტი, მიღებული კანონპროექტით, აფხაზეთის ავტონომიური რესპუბლიკის კონსტიტუციით რეგულირებად საკითხებში ჩაერია. მიხეილ სააკაშვილის აზრით, კანონპროექტი ავტონომიური რესპუბლიკის ლეგიტიმური ორგანოების სტატუსს აკნინებს. როგორც საკითხის განხილვისას ოპოზიციის მხრიდან აღინიშნა, "ნორმატიული აქტების შესახებ" კანონში დაგეგმილ ცვლილებს პოლიტიკური ამოცანაც გააჩნია და მისი მიღების მიზანი, აფხაზეთის უმაღლეს საბჭოს მთავრობის ხელმძღვანელის პოსტზე ვახტანგ ყოლბაიას დანიშვნის შესაძლებლობაა. "ნორმატიული აქტების შესახებ" კანონში შეტანილი ცვლილებები კონსტიტუციით დადგენილ ვადებში, პარლამენტის თავმჯდომარის ხელმოწერით გამოქვეყნდება.
