ქალაქ ვოლგოგრადში, რკინიგზის სადგურზე მომხდარ აფეთქებას 15 ადამიანის სიცოცხლე ემსხვერპლა; დაშავებულია 50-მდე ადამიანი, მათ შორის არიან ბავშვებიც.
„რია ნოვოსტის“ ინფორმაციით, შემთხვევა დღის პირველ საათზე მოხდა. დაღუპულთა შორის არის სამართალდამცავი ორგანოს წარმომადგენელი, რომელმაც, როგორც ცნობილია, ტერორისტი სადგურის ტერიტორიის სიღრმეში არ შეუშვა. „იმ შემთხვევაში თუ ბოროტმოქმედი მოსაცდელ დარბაზში შეღწევას მოახერხებდა, მხვერპლი გაცილებით დიდი იქნებოდა“- აცხადებენ გამომძიებლები.
აღძრულია სისხლის სამართლის საქმე. გამოძიებამ მომხდარ ფაქტს ტერაქტის კვალიფიკაცია უკვე მიანიჭა.
ჯერჯერობით დაუდგენელია რა ტიპის ასაფეთქებელი მოწყობილობა ამოქმედდა შენობის შესავლელში.
რკინიგზის სადგურიდან ხალხის ევაკუაცია განხორციელდა. ტერიტორია სამართალდამცავებს აქვთ შემოღობილი. ადგილზე ერთმანეთის მიყოლებით მიდიან სასწრაფო დახმარების მანქანები.
