„ცენტრ პოინტის“ შემდეგ „დექსუსის“ წინააღმდეგ სკანდალურ განცხადებას კიდევ ერთი სამშენებლო კომპანიის „ოლიმპიური ვარსკვლავის“ წარმომადგენლები აკეთებენ.

„კომპანია „დექსუსი“ ერთი წლის განმავლობაში ძალდატანებით ცდილობდა „ოლიმპიური ვარსკვლავის“ მმართველობის ხელში ჩაგდებას. მთელი ამ პერიოდის განმავლობაში, „ოლიმპიური ვარსკვლავი“ დევნილი და რეპრესირებული კომპანია იყო, რომლის პრობლემები ხელოვნურად გამოიწვიეს. კომპანიას  ორი  წლის განმავლობაში კრედიტთან დაკავშირებული პრობლემები ჰქონდა, თუმცა ახლო მომავალში მშენებლობები ჩვეულ რეჟიმში განახლდება  და ამ მიზნით მოლაპარაკებები უკვე მიმდინარეობს“, – განუცხადა commersant.ge-ს კომპანიის წარმომადგენელმა ლელა რაზიკაშვილმა.

რაზიკაშვილი არ აკონკრეტებს, მონაწილეობდნენ თუ არა მათთან მოლაპარაკებებში ხელისუფლების წარმომადგენლები, როგორც, ვახტანგ რჩეულიშვილის განცხადებით, „ცენტრ–პოინტის“ შემთხვევაში ხდებოდა.

„ოლიმპიური ვარსკვლავი“ „ქართუ ბანკისგან“ 20 მილიონი დოლარის სესხის მიღებას ელოდება და ირწმუნება, რომ კრედიტის მიღებისთანავე შეჩერებულ ობიექტებზე მშენებლობას დაიწყებს. მშენებლობების განახლების პირობა კომპანიამ ბოლო წლებში მომხმარებელს არაერთხელ მისცა, თუმცა სამუშაოები ამ დრომდე არ განახლებულა.

როგორც „ცენტრ–პოინტის“ დამფუძნებელი ვახტანგ რჩეულიშვილი აცხადებს, კომპანიის „დექსუსისთვის“ მართვაში გადაცემა მათ ყოფილმა ხელისუფლებამ მოსთხოვა.