ეროვნულ ბიბლიოთეკაში "შრომის კოდექსის" ბეჭდური ვერსიის პრეზენტაცია გაიმართა. ღონისძიებას იუსტიციის მინისტრი, თეა წულუკიანი დაესწრო. პრეზენტაციაზე "ქართული ოცნების" პრეზიდენტობის კანდიდატი გიორგი მარგველაშვილი და გაერთიანებული პროფკავშირების თავმჯდომარე ირაკლი პეტრიაშვილი იმყოფებოდნენ.
იუსტიციის მინისტრმა თეა წულუკიანმა დამსწრე საზოგადოებას საკანონმდებლო მაცნესთან წლების წინ არსებული სტამბის აღდგენა მიულოცა. მისი თქმით, საზოგადოებრივი მნიშვნელობიდან გამომდინარე, პირველი წიგნი, რომელიც ამ სტამბაში დაიბეჭდა, "საქართველოს შრომის კოდექსია".
გამოცემა სამენოვანია. ტექსტი ინგლისურად საკანონმდებლო მაცნეს მთარგმნელობით ცენტრში ითარგმნა, ხოლო რუსული თარგმანი პარლამენტში არსებულ მთარგმნელობით ცენტრში შესრულდა.
"ჩვენ ასევე გადავწყვიტეთ შეგვექმნა სარედაქციო ჯგუფი, რომელიც სტამბას ურჩევს რომელი საკანონმდებლო აქტები გამოსცეს ბეჭდური ფორმით. პირველი კი საზოგადოებრივი ინტერესიდან და მნიშვნელობიდან გამომდინარე არის "შრომის კოდექსი", რომელიც კონსესუსის და კომპრომისის შედეგია და თანაბრად ახარებს დამსაქმებელსა და დასაქმებულს." - განაცხადა წულუკიანმა.
სარედაქციო საბჭოს საქართველოს იუსტიციის მინისტრი უხელმძღვანელებს.
