საქართველოს პრეზიდენტი დღეს პოლონეთის პოლიტიკური პარტიის „უფლებები და სამართლიანობა" თავმჯდომარეს, ყოფილ პრემიერ-მინისტრს იაროსლავ კაჩინსკის შეხვდა. საუბრის მთავარი თემა ორ ქვეყანას შორის თანამშრომლობის გაღრმავება და სამომავლო ურთიერთობა იყო.
"ჩვენ არასოდეს დაგვავიწყდება საქართველოს ეროვნული გმირის ლეხ კაჩინსკის განსაკუთრებული ღვაწლი საქართველოს დამოუკიდებლობის გადარჩენაში, დამპყრობლის შეჩერებაში თბილისის კარიბჭესთან, იმაში, რომ საქართველოს დროშა ჯერ კიდევ ამაყად ფრიალებს საქართველოს სახელმწიფო დაწესებულებებზე, საქართველო არის თავისუფალი და ქართული სახელმწიფოებრიობა გადარჩა. ორივე ძმა - იაროსლავი და ლეხი იყვნენ საოცრად გამბედავნი, ძალიან გონიერი ადამიანები, რომელთათვისაც საქართველო მათი გულის და სულის ნაწილია. მათი ინიციატივით ვარშავაში გაიხსნა იმ ქართველი ოფიცრების ძეგლი, რომლებიც პოლონეთის დამოუკიდებლობის გადასარჩენად იბრძოდნენ. ამიტომ ჩვენთვის ეს ვიზიტი არის მნიშვნელოვანი და მადლობელი ვარ იმისათვის, რომ ამასწინათ პოლონეთის პარლამენტის საგარეო კომიტეტში გაიმართა მოსმენები საქართველოზე, მადლობელი ვარ იმისათვის, რომ არაერთი მხარდამჭერი განცხადება გააკეთეს ოკუპაციის წინააღმდეგ, მადლობელი ვარ იმისათვის, რომ დღეს იაროსლავ კაჩინსკიმ მოინახულა საქართველოს ყოფილი პრემიერ-მინისტრი ვანო მერაბიშვილი, რომელიც სრულიად უსამართლოდ და მხოლოდ პოლიტიკური მიზეზებით არის დაპატიმრებული და ამას წყალი არ გაუვა და ყველა აღიარებს ქვეყნის შიგნით და ქვეყნის გარეთ. მე დარწმუნებული ვარ, რომ სამართალი იზეიმებს და ეს უკანონობა შეჩერდება და შეწყდება", - განაცხადა პრეზიდენტმა.
შეხვედრაზე საუბარი საქართველოს ევროატლანტიკურ სტრუქტურებში ინტეგრაციის პროცესსაც შეეხო. იაროსლავ კაჩინსკიმ კიდევ ერთხელ გამოხატა ევროატლანტიკურ სტრუქტურებში საქართველოს ინტეგრაციის სრული მხარდაჭერა და, ამ მხრივ, ქვეყანას წარმატებები უსურვა. მხარეებმა ყურადღება ქვეყანაში მიმდინარე მოვლენებზეც გაამახვილეს და დემოკრატიული რეფორმების გაგრძელების აუცილებლობაზე ისაუბრეს.
