ეკონომიკის მინისტრი, ვიცე-პრემიერი გიორგი კვირიკაშვილი არ გამორიცხავს, რომ ბიძინა ივანიშვილის პოლიტიკიდან წასვლის შემდეგ, პრემიერ-მინისტრის პოსტზე ერთ-ერთ კანდიდატურად მისი საკითხიც განიხილებოდეს.
"არ ვიცი ვინ შეიძლება იყოს ბიძინა ივანიშვილის შემცვლელი. ძალიან ბევრი ღირსეული ადამიანი გვყავს, შეიძლება ერთი ჩემი კანდიდატურაც იყოს, თუმცა ხაზს ვუსვამ, რომ არაერთი ღირსეული კანდიდატურა გაგვაჩნია," - განაცხადა გიორგი კვირიკაშვილმა.
თუმცა ეკონომიკის მინისტრს სურს, რომ პრემიერ-მინისტრი გარკვეული ვადით კიდევ დარჩეს პოლიტიკაში.
"ეს მისი გადაწყვეტილებაა და მან უნდა გააკეთოს კომენტარი," - აღნიშნა კვირიკაშვილმა.
ბელგიური გამოცემა Euobserver-სთან ინტერვიუში ბიძინა ივანიშვილმა განაცხადა, რომ პრემიერ-მინისტრის თანამდებობიდან "ახალ წლამდე" გადადგება.
