„თუ ვინმეს ეგონა, რომ მე პუტინს რამე შეურაცხყოფა მივაყენე, შენი ჭირიმე, შენ გენაცვალეს გარდა, არასოდეს მასთან სხვა ენით არ მილაპარაკია ომამდე. ომის შემდეგ ოკუპანტისთვის ენის მოჩლექვა და ფეხების დაკოცვნა ღირსეული საქციელი არ არის. ომამდე კი შესაძლებელი იყო ზედმეტად დიპლომატიურები ვყოფილიყავით. როცა დღეს შენი ქვეყნის ოკუპანტზე ლაპარაკობ, რომ პუტინი კარგია და მას ქართველებისთვის სიკეთე უნდა, ეს ძალიან ჰგავს ზოგიერთ იმ შემარცხვენელ ქართულ ისტორიას, რომელსაც ღალატი ჰქვია. სხვა განმარტება გარდა ღალატისა არ არსებობს,"-განაცხადა მიხეილ სააკაშვილმა.
პრეზიდენტმა ყველას მოუწოდა, რომ თავი ღალატისგან შორს დაიჭირონ. მისი განცხადებით, საქართველო აუცილებლად გამოვა სიტუაციიდან. ამასთან, პრეზიდენტმა აღნიშნა, რომ რუსეთისგან ფული წარმატებულად მხოლოდ ორმა ადამიანმა გამოიტანა, აბრამოვიჩმა, რომელიც „ პუტინის ერთ-ერთი მოლარეა" და ბიძინა ივანიშვილმა.
„ჩვენი გეგმა უნდა იყოს საქართველოს ინტეგრაცია ევროატლანტიკურ სტრუქტურებში და საქართველოს მაქსიმალური ეკონომიური განვითარება, რომ რუსეთმა პოსტსაბჭოთა ივრცეში ვეღარასოდეს დაგვაბრუნოს. შევარდნაძე ზუსტად ისევე ეზიზღებოდა რუსეთს, როგორც- მე. შევარდნაძისგან განსხვავებული ფიგურა იყო გამსახურდია, გამსახურდიაც რუსეთის მტერი იყო,"-აღნიშნა პრეზიდენტმა.
