ბათუმში, ქიქავას ქუჩაზე, ყოფილი რკინიგზის საავადმყოფოს შენობაში თვითნებურად შეჭრილი 60 ოჯახი ელექტროენერგიით მომარაგებას ითხოვს. ისინი აჭარის მთავრობას სთხოვენ, ენერგოკომპანია „ენერგო-პრო ჯორჯიასთან" უშუამდგომლონ.
თვითნებურად შეჭრილებმა აქცია გამართეს და აღნიშნეს, რომ წელიწადნახევრის განმავლობაში ელექტროენერგიის პრობლემა ვერ მოაგვარეს, რის გამოც სკოლის მოსწავლეები გაკვეთილებს სათანადოდ ვერ ამზადებენ.
„ჩვენ ვართ თვითნებურად შესახლებულები, ძალიან გვიჭირს. ბავშვები ვერ მეცადინეობდნენ და ჩამორჩნენ პროგრამას. მასწავლებლები უკმაყოფილებას გამოთქვამენ, მოუმზადებლად რომ მიდიან გაკვეთილებზე. ვთხოვთ აჭარის მთავრობას, დროებით, სანამ აბონენტები გავხდებით, შუქი ჩაგვირთონ", - აღნიშნა ინეზა ცინცაძემ.
ყოფილი რკინიგზის შენობაში სხვადასხვა სოციალური სტატუსის მქონე მოსახლეობაა თვითნებურად შესახლებული. მათ შორის, დევნილები, ეკომიგრანტები, შეზღუდული შესაძლებლობების მქონე პირები და სოციალურად დაუცველები.
„ახალ მთავრობას ვთხოვთ, გვიშუამდგომლონ და მოგვცენ შუქი, რადგან დავჩლუნგდით, დავგლახავდით, ტელევიზორი არ გვინახავს წელიწადი და ოთხი თვეა. ახალი მთავრობის სირცხვილიცაა ეს. მათ რომ ვჭირდებოდით, დღეში ხუთჯერ მოდიოდნენ. ვისაც ხმა და სული მივეცით, მათ ვთხოვთ დახმარებას", - აღნიშნა ქეთევან კაკაბაძემ.
