პროტოპრესვიტერმა გიორგი ზვიადაძემ უმცირესობების წარმომადგენლების მიმართ საპატრიარქოს დამოკიდებულებაზე ისაუბრა. მისი თქმით, ეკლესიისთვის მიუღებელია ცოდვა და არა – ცოდვის ჩამდენი პიროვნება. მანვე აღნიშნა, რომ ერთსქესიანთა კავშირი ერთ-ერთი უმძიმესი ცოდვაა, თუმცა არც ერთ სასულიერო პირს არ აქვს უფლება რომელიმე ადამიანზე იძალადოს. განმარტება გიორგი ზვიადაძემ საზოგადოებრივი მაუწყებლის ეთერში გააკეთა.
“ეკლესიისთვის მიუღებელია რაიმე სახის ძალადობა ნებისმიერ პიროვნებაზე, იქნება ეს სექსუალური უმცირესობის წარმომადგენელი თუ რომელიმე სხვა უმცირესობის წარმომადგენელი. ეკლესიას ამგვარი დამოკიდებულება არავის მიმართ არ გააჩნია. საეკლესიო ეთიკაში გაურკვევლობამ, ეკლესიის ბუნების არცოდნამ ძალიან ბევრ ადამიანს შეცდომის შესაძლებლობა მისცა.
ეკლესია ერთმნიშვნელოვნად ამბობს იმას, რომ უკიდურესი ცოდვაა და ყველა ცოდვათა შორის უბილწესი და ღვთის განმამაწარებელ ცოდვათა შორის უმძიმესი ცოდვა, რაც ასე წერია რუის-ურბნისის საეკლესიო კრების განჩინებაში, რომელიც ყველაზე ავტორიტეტული კრებაა, რაც საქართველოში გამართულა და საერთოდ, მთელი ეკლესიის სწავლება, სულიწმინდისეული წმინდა წერილის სწავლება, ეკლესიის მამათა სწავლებანი, საეკლესიო კანონები, ეს ყველაფერი ერთმნიშვნელოვნად განაჩინებს იმას, რომ ერთსქესიანთა ქორწინება, ერთსქესიანთა ურთიერთობა – ეს არის უკიდურესი ცოდვა, ეს არის ერთმნიშვნელოვანი, მაგრამ ეს არავითარ შემთხვევაში არ ნიშნავს იმას, რომ რომელიმე ჩვენგანმა, ეკლესიის რომელიმე წევრმა აღასრულოს რაიმე სახის ძალადობა. ეკლესიისთვის ყოველთვის მიუღებელია ცოდვა და არა ცოდვის ჩამდენი პიროვნება, არა შემცოდე პიროვნება. რა თქმა უნდა, როდესაც პიროვნება რაიმე ცოდვას სჩადის, ის ძალიან მძიმედ სცოდავს ღმერთის წინაშე და თუკი ის მიმართავს ეკლესიას, ეკლესიის მოვალეობაა, რომ დაეხმაროს ამ ადამიანებს, თვალი აუხილოს, შეაცნობინოს საკუთარი ცოდვის სიმძიმე და სინანულის მეშვეობით უწინამძღვროს მას”, - განმარტა გიორგი ზვიადაძემ.
