„20 იანვრიდან მოყოლებული ირანი პირველად დაიწყებს გამდიდრებული ურანის მარაგის ლიკვიდაციას და ინფრასტრუქტურის ნაწილის დემონტაჟს მოახდენს, რომელიც მის წარმოებას ახდენს", - განაცხადა აშშ-ის პრეზიდენტმა ბარაკ ობამამ. ინფორმაციას ამის შესახებ „ბიბისი" ავრცელებს.

თეთრი სახლის მიერ გავრცელებულ განცხადებაში აღნიშნულია, რომ თუ ირანი არ შეასრულებს ვალდებულებებს, აშშ სანქციების გამკაცრებაზე გადავა.

ირანი ასევე დათანხმდა, უარი თქვას ახალი ცენტრიფუგების მშენებლობაზე, რომელიც ურანის გასამდიდრებლად გამოიყენება. გასულ წელს, ეგრეთ წოდებულ „ექვსეულსა" და ირანს შორის მიღწეული შეთანხმების თანახმად, ირანი ურანს 5%-ზე მეტით აღარ გაამდიდრებს, რის სანაცვლოდაც მის წინააღმდეგ დაწესებული მკაცრი ეკონომიკური სანქციები შემსუბუქდება.