საქართველოს რამდენიმე რეგიონში დიდთოვლობაა. საავტომობილო გზებზე დაწესებული შეზღუდვები უკვე მოქმედებს. დასუფთავების სამსახურის ტექნიკური პერსონალი საავტომობილო გზების გასაწმენდად საგანგებო რეჟიმში მუშაობს.

გორში გზების გაწმენდა და ტექნიკური მარილის დაყრა დილიდან მიმდინარეობს.  თოვა რეგიონში გვიან ღამით დაიწყო და ამ დრომდე გრძელდება.  თოვლის საფარმა უკვე 25 სმ-ს მიაღწია.

შეზღუდვები დაწესდა რიკოთის უღელტეხილზე. ამ დრომდე აკრძალულია მისაბმელიანი და ნახევრამისაბმელიანი ტრანსპორტის გადაადგილება. ადგილზე ვითარებას საპატრულო პოლიცია აკონტროლებს.

საგზაო დეპარტამენტის თავმჯდომარის მოადგილის ვაჟა ფანჩულიძის განცხადებით, საქართველოს რამდენიმე რეგიონში საავტომობილო გზებზე შეზღუდვები მოქმედებს.

„ამინდის გაუარესებიდან გამომდინარე საავტომობილო გზების დეპარტამენტი პერიოდულად  შეზღუდვებს ადგენს. კობი-გუდაურის საავტომობილო მონაკვეთზე ნებისმიერი სახის ტრანსპორტისთვის  მოცურების საწინააღმდეგო ჯაჭვებით გადაადგულება დაშვებულია. საავტომობილო გზების დეპარტამენტის სახელით მინდა მოვუწოდო მოსახლეობას, რომ  მაქსიმალურად დაემორჩილონ ჩვენს მიერ გამოცხადებულ შეზღუდვებს და შესაბამისი სეზონის ავტო-საბურავებით ისარგებონ.“- აცხადებს ფანჩულიძე.  

სინოპტიკოსების ვარაუდით, თოვა მთელი საქართველოს მასშტაბით დღეს საღამოს შეწყდება.

                                                                             (მოამზადა თეონა რამაზაშვილმა)