აშშ-ის სახელმწიფო მდივნის მოადგილემ ვიქტორია ნულანდმა სენატში გამართულ საგარეო ურთიერთობათა კომიტეტის სხდომაზე უკრაინის ხელისუფლებას და აქციის მონაწილეებს მოუწოდა - ძალა არ გამოიყენონ. მისი თქმით, ევროკავშირს და აშშ-ს უკრაინაში მიმდინარე პოლიტიკური დაპირისპირების მშვიდობიანად მოგვარება სურთ.
„უკრაინელთა უმრავლესობის მსგავსად, აშშ-სა და ჩვენს პარტნიორებს ევროკავშირში სურთ, რომ მიმდინარე დაპირისპირება პოლიტიკური, დემოკრატიული და პირველ რიგში, მშვიდობიანი გზით მოგვარდეს", - განაცხადა ნულანდმა.
ნულანდი პატიმრობაში მყოფ იულია ტიმოშენკოს საქმესაც გამოეხმაურა და განაცხადა, რომ მისი გათავისუფლება უკრაინის მიერ ევროპული გზის ერთგულების მინიშნება იქნება, თუმცა იანუკოვიჩი ამ გადაწყვეტილების მისაღებად მზად არ არის.
„ტიმოშენკოს საკითხი ყოველ შეხვედრაზე დღის წესრიგში დგას. მისი გათავისუფლება უკრაინის მხრიდან ევროპული გზის ერთგულების ძლიერი სიგნალი იქნებოდა. მაგრამ, როგორც ჩანს, პრეზიდენტი იანუკოვიჩი მზად არ არის ეს ნაბიჯები გადადგას", - განაცხადა ვიქტორია ნულანდმა.
ამავე შეხვედრაზე, დემოკრატმა სენატორმა რობერტ მენენდესმა განაცხადა, რომ იმ შემთხვევაში, თუ უკრაინის ხელისუფლება მომიტინგეების წინააღმდეგ ძალას კიდევ გამოიყენებს, უკრაინის მიმართ სანქციების დაწესებას მხარს დაუჭერს.
