გორში აქცია გრძელდება. აქციის მონაწილეები დღეს დილიდან ქალაქის ცენტრში არსებული ბაზრის გარეუბანში გადატანას აპროტესტებენ. საპროტესტო გამოსვლები მესამე დღეა მიმდინარეობს. მოვაჭრეებთან ერთად მსვლელობაში მონაწილეობა „ლეიბორისტული პატრიის" ლიდერმა შალვა ნათელაშვილმა მიიღო.

გორის ადმინისტრაციულ შენობასთან აქციის მონაწილეები ქალაქის ცენტრიდან მივიდნენ. ნათელაშვილი გორის საკრებულოს თავმჯდომარეს შეხვდა.

„შევხვდით ქალაქის და რაიონის ხელმძღვანელობას. ისინი აცხადებენ, რომ ინვესტორთან, რომელიც ისრაელის მოქალაქეა, მოლაპარაკებებს გააგრძელებენ და მაქსიმუმს გააკეთებენ იმისათვის, რომ ხალხი დარჩეს იმ ადგილას, სადაც მუშაობს. გორის ცენტრში, ტრადიციულ ბაზარში", - განაცხადა შეხვედრის შემდეგ შალვა ნათელაშვილმა.

გორის საკრებულოს წევრის დავით რაზმაძის განცხადებით, ინვესტორთან  მოლაპარაკებები გაგრძელდება.

„პირველ რიგში დგას ხალხის ინტერესი. 2000 კაცის უკან  კიდევ ბევრი ადამიანი არის. რა თქმა უნდა, პირველ რიგში მათი ინტერესები იქნება დაცული, ალბათ ინვესტორიც ყველაფერს გაითვალისწინებს და ამის მიხედვით დადგება საბოლოო შედეგი", - აღნიშნავს გორის საკრებულოს წევრი.