,,დღეს, მე მინდა კიდევ ერთხელ შეგახსენოთ, რომ სულიერი და ინტელექტუალური, ფიზიკური შრომის გარეშე, არაფერი არ გამოდის. ადამიანმა უნდა იმოღვაწეოს სულიერად,"- ამის შესახებ სრულიად საქართველოს კათოლიკოს პატრიარქმა, ილია მეორემ, ნათლისღების დღესასწაულზე, სამების საკათედრო ტაძარში ქადაგებისას განაცხადა.
,,რა უნდა აკეთოს ადამიანმა, იმისათვის რომ მისი გული, მისი სულიერი სამყარო გახდეს ტაძარი სულისა წმინდისა. უპირველეს ყოვლისა სულიერად უნდა იშრომოს. უნდა დაამყაროს კავშირი ზეცასთან. ადამიანმა უნდა დაამყაროს კავშირი წინაპრებთან და დაამყარებს მხოლოდ იმ შემთხვევაში თუ მას სუფთა გული აქვს. თუ თითონ გახდა ტაძარი სულისა წმინდისა. დღეს მე მინდა კიდევ ერთხელ შეგახსენოთ, რომ სულიერი და ინტელექტუალური, ფიზიკური შრომის გარეშე, არაფერი არ გამოდის. ადამიანმა უნდა იმოღვაწეოს სულიერად. მე მითქვამს თქვენთვის ერთი შემთხვევა, რომ ადამიანი რჩებოდა წირვის შემდეგ და უყურებდა მაცხოვრის ხატს და როცა მოძღვარი შეეკითხა მას, რომ რას უყურებ ლოცულობო? მან უპასუხა - არაო. მაშ ხატის მხატვრობას სწავლობო? - არაო. მაშ რატომ უყურებო? ადამიანმა მიუგო- მე მას ვუყურებ, ის მე მიყურებსო და ჩვენ ერთად კარგადა ვართო. აი ეს არის ჩვენი მიზანი, რომ ვხედავდეთ უფალს, ჩვენი სული უნდა ხედავდეს უფალს. უნდა უყუროს უფალს, ის შემოგხედავს, გიყურებს შენ და ერთად კარგად ვიქნებით,"- ბრძანა უწმინდესმა.
