გვიან ღამით კიევის ცენტრში ძალოვნების მხრიდან მომიტინგეებზე შტურმი არ მომხდარა, თუმცა, გრუშევსკის ქუჩაზე, დემონსტრანტებსა და "ბერკუტს" შორის შეტაკებები 15 საათზე მეტხანს გრძელდებოდა. ამის შესახებ უკრაინული მედია იუწყება. ამ დროისთვის ქუჩის ერთ მხარეს ძალოვანებს კორდონი აქვთ გაკეთებული.
უკრაინული მედიის ცნობით, დემონსტრანტებსა და ძალოვნებს შორის გუშინდელი შეტაკებების შედეგად დაშავებულთა რაოდენობა ამ დროისთვის ასზე მეტს აღწევს.
დემონსტრანტებმა ძალოვანების ოთხი ავტობუსი და ორი სატვირთო ავტომანქანა გადაწვეს.
აშშ-ის ეროვნული უსაფრთხოების საბჭოს წარმომადგენელი კეიტლინ ჰეიდანი უკრაინის ხელისუფლებას კიევის ცენტრიდან სპეცდანიშნულების რაზმის გაყვანას და ოპოზიციასთან დიალოგის დაწყებას სთხოვს. კეიტლინ ჰეიდანის განცხადებით, თუ უკრაინის ხელისუფლება ამ მოთხოვნებს არ შეასრულებს, აშშ მათ წინააღმდეგ სანქციებს გამოიყენებს.
"მოვუწოდებთ უკრაინის ხელისუფლებას, გადადგას ნაბიჯები, რომელიც უკრაინის უკეთეს მომავალს უზრუნველყოფს, მათ შორის გააუქმოს ანტიდემოკრატიული კანონმდებლობა, რომელსაც რამდენიმე დღის წინ მოეწერა ხელი. ასევე მოვუწოდებთ ხელისუფლებას, კიევის ცენტრიდან სპეცდანიშნულების რაზმის გამოყვანისა და პოლიტიკურ ოპოზიციასთან დიალოგის დაწყებისკენ", - განაცხადა თეთრი სახლის წარმომადგენელმა.
ევრომაიდანზე შეკრებილების უკმაყოფილება რადას მიერ 16 იანვარს მიღებულმა კანონებმა გამოიწვია, რომელიც საპროტესტო აქციების გამართვის წესებს ამკაცრებს.
