ოდესაში, ლვოვსა და როვნოში აქტივისტებს კიევისკენ მიმავალი ძალოვანებისთვის გზა აქვთ ბლოკირებული.
უკრაინული მედიის ინფორმაციით, ოდესაში აქტივისტებს რამდენიმე ქუჩა აქვთ გადაკეტილი და ძალოვნების ავტობუსებს, რომლებიც კიევისკენ მიემართებიან, არ ატარებენ.
ლვოვში აქტივისტებმა ნახევარმეტრიანი ბარიკადები ააგეს და შინაგანი ჯარების წარმომადგენლებს არ უშვებენ. როვნოში კი ადგილობრივებმა "ბერკუტის" ავტობუსს ბაზიდან გამოსვლის ნება არ მისცეს. აქტივისტები სპეცდანიშნულების რაზმს მოუწოდებენ, კიევში არ წავიდნენ.
არსებული ინფორმაციით, როვნოდან "ბერკუტის" ერთ-ერთი დანაყოფის ორი ავტობუსი მაინც გაემართა კიევისკენ.
კიევში, დემონსტრანტებსა და სამართალდამცავებს შორის წუხანდელი შეტაკებების შედეგად საერთო ჯამში ასზე მეტი ადამიანია დაშავებული. სიტუაცია კიევში მას შემდეგ დაიძაბა, რაც უმაღლესმა რადამ 16 იანვარს მიიღო კანონები, რომელიც აქციების გამართვის წესებს ამკაცრებს და სამოქალაქო აქტივობის შეზღუდვას ითვალისწინებს.
