„ამერიკის შეერთებულმა შტატებმა უკრაინის პრეზიდენტის, ვიქტორ იანუკოვიჩის წინააღმდეგ პერსონალური სანქციები უნდა შემოიღოს" - ამის შესახებ ამერიკული უფლებადამცველი ორგანიზაციის Freedom House-ის პრეზიდენტი დევიდ კრემერი აცხადებს. „ამერიკის ხმისთვის" მიცემულ ინტერვიუში კრემერი ამბობს, რომ დროა, არა მხოლოდ განიხილებოდეს სანქციების დაწესების საკითხი, არამედ ეს უნდა განხორციელდეს კიდეც.
„აშშ-ის ვიცე-პრეზიდენტმა, ჯოზეფ ბაიდენმა უნდა დაურეკოს იანუკოვიჩს და უთხრას, რომ თუ მომიტინგეების წინააღმდეგ ძალის გამოყენებას არ შეწყვეტს, ის იმ სიას ჩაუდგება სათავეში, რომელთა წინააღმდეგ აშშ სანქციებს დააწესებს. მოვიდა დრო, რომ არა მხოლოდ განიხილებოდეს სანქციების დაწესების საკითხი, არამედ ეს განხორციელდეს", - განაცხადა კრემერმა.
კრემერი მხარს უჭერს უკრაინაში აშშ-ის სპეციალური წარმომადგენლების, სენატორების - ჯონ მაკკეინის, კრის მერფის და ბენ კარდინის გამგზავრებას.
„დასავლეთი უნდა დადგეს მათ დასაცავად, ვინც გამოდის პარტია "რეგიონების" ანტიდემოკრატიული ქმედებების წინააღმდეგ. მათ პასუხი უნდა აგონ თავიანთ საქციელზე", - აღნიშნა უფლებადამცველი ორგანიზაციის პრეზიდენტმა.
