კიევში შტურმისთვის ემზადებიან.
"ბერკუტის" მოსალოდნელი იერიშის მოსაგერიებლად ოპოზიციის შტაბში სრული მობილიზაცია გამოცხადდა. უკრაინული მედიის ინფორმაციით, პროფკავშირების სასახლეში უსაფრთხოების ზომებია გაძლიერებული, მომიტინგეების ნაწილი ბარიკადებს ამაგრებს.
გავრცელებული ინფორმაციით, მაიდანის შტურმი დღეს საღამოს იგეგმება. სახელმწიფო რადიო, რომელიც კრეშატიკზეა განთავსებული, ამის შესახებ უკვე გააფრთხილეს და შენობის დაცლა მოსთხოვეს.
გრუშევსკის ქუჩაზე სიტუაცია დღის მეორე ნახევარში უკიდურესად მას შემდეგ დაიძაბა, რაც ძალოვანებმა მომიტინგეების დარბევა დაიწყეს. აქციის მონაწილეებმა "ბერკუტის" მისამართით ქვები და აალებადი ნივთიერებები ისროლეს.
"დინამოს" სტადიონთან მძიმე ტექნიკაც გამოჩნდა.
ძალოვანები მომიტინგეებს სასტიკად გაუსწორდნენ.
დაშავებულმა დემონსტრანტებმა გაავრცელეს ინფორმაცია, რომ "ბერკუტმა" მათ წინააღმდეგ ცეცხლსასროლი იარაღი გამოიყენა. ბოლო ინფორმაციით, დაღუპულია ხუთი და დაშავებულია რამდენიმე ასეული ადამიანი.
აქტივისტებმა ძალოვანებისგან თავდაცვის მიზნით, საბურავების დაწვა დაიწყეს, რის შემდეგაც გრუშევსკის ქუჩა შავ კვამლში გაეხვია. დღის ბოლოს გრუშევსკის ქუჩაზე წყლის ჭავლის მანქანები გამოჩნდა, რომელთა მეშვეობითაც აალებული საბურავები ჩააქრეს.
ამასთან, უკრაინის მთავრობამ მომიტინგეების წინააღმდეგ წყლის ჭავლის გამოყენებასთან დაკავშირებული შეზღუდვებიც მოხსნა. გაფართოვდა იმ სპეციალური საშუალებების ჩამონათვალიც, რომელთა გამოყენებაც საზოგადოებრივი წესრიგის აღსადგენად დასაშვებია.
