თამარ სანიკიძე მასწავლებელთა სასერტიფიკაციო გამოცდების შედეგებს გამოეხმაურა და აღნიშნა, რომ პედაგოგებისთვის გადამზადება აუცილებელია. ეს განცხადება მინისტრმა სამდღიან სემინარზე გააკეთა, რომელსაც უცხოელი ექსპერტები ესწრებიან.
„ტესტირება არ არის თვითმიზანი. თვითმიზანი გადამზადებული კომპეტენტური მასწავლებელია. ჩვენ აქცენტი უნდა გავაკეთოთ იმ კარიერული განვითარებისა და კვალიფიკაციის ამაღლების პერიოდზე და პროცესზე, რომელიც წინ უძღვის ამ ტესტირებას."- განაცხადა განათლების მინისტრმა.
სანიკიძემ აღნიშნა, რომ ქუთაისში პედაგოგთა გადამზადების ცენტრი 2011 წლიდან ფუნქციონირებს, ბათუმში კი სექტემბრიდან იხსნება. აღნიშნული ცენტრები პედაგოგთა სასერტიფიკაციო გამოცდების წარმატებულად ჩაბარებას შეუწყობს ხელს.
შეგახსენებთ, წელს პედაგოგების უმრავლესობამ სასერტიფიკაციო გამოცდებში ბარიერი ვერ გადალახა.
