რუსეთის საგარეო უწყების პირველი პირმა სერგეი ლავროვმა საკმაოდ კრიტიკულად მოიხსენია უკრაინის ოპოზიცია და ის მეთოდებიც გააკრიტია, რომელსაც ისინი საპროტესტო აქციების დროს მიმართავენ.
მისი განცხადებით, უკრაინაში მიმდინარე პროცესების უკან მესამე ძალები დგანან, რომელბიც დაძაბულობის გაღრმავებას ცდილობენ. ლავროვის განმარტებით რუსეთი ფლობს კონკრეტულ ინფორმაციას, რაც იმის თქმის საფუძველს იძლევა რომ უკრაინაში მიმდინარე პროცესები სწორედ უცხოეთიდან არის ინსპირირებული.
სერგეი ლავროვის თქმით, ისეთი ქმედებები როგორიც არის აქციის მონაწილეების მიერ მერიისა და სხვა სახელმწიფო შენობების აღება, მიუღებელი უნდა იყოს ნებისმიერი ევროპული ქვეყნისთვის. ევროკავშირი ასეთ ქმედებებს არასოდეს დაუშვებდა.
მინისტრი მიიჩნევს რომ მესამე ძალებს უკრაინაში უკვე დიდი ხანია საკუთარი თამაში მიჰყავთ, თანაც ისე რომ არ ითვალისწინებენ ოპოზიციის ინტერესებს. ისინი უკრაინაში დაძაბულობის გაღრმავებას ცდილობენ.
ამ ვითარებაში, ლავროვი მიიჩნევს, რომ რუსეთს შეუძლია შუამავლის როლი ითამაშოს უკრაინის ხელისუფლებასა და ოპოზიციას შორის. ამავე დროს, ლავროვმა უარი განაცხადა რაიმე სახის კომენტარი გაეკეთებინა უკრაინის შესაძლო გაყოფაზე.
