უკრაინული მედიის ინფორმაციით, "რეგიონების" წევრები და უფრაქციო დეპუტატები მთავრობის გადადგომას და 16 იანვარს მიღებული კანონების შეცვლას ითხოვენ. ამის შესახებ უმაღლესი რადას თავდაცვისა და უშიშროების კომიტეტის თავმჯდომარე ვლადიმრ ლიტვინმა "ფეისბუქში" საკუთარ გვერდზე დაწერა. 
"უკრაინაში სამოქალაქო კონფლიქტი სამოქალაქო ომში გადაიზრდება. ამას უკვე წინ ვეღარავინ აღუდგება. ამ ყველაფრის ფასი ადამიანების ცხოვრებაა. ასეთ საშიშ ვითარებაში უმაღლესი რადა ვერ შეძლებს, დარჩეს სხვაზე დამოკიდებული და ორ დაპირისპირებულ ბანაკად გაყოფილი. უმაღლესმა რადამ ქვეყანაზე პასუხისმგებლობა უნდა აიღოს. ეს კი კონსოლიდაციას, შიდა დაპირისპირების დავიწყებას და გადაუდებელი გადაწყვეტილებების მისაღებად დიალოგის დაწყებას გულისხმობს, რამაც ქვეყანაში საგანგებო მდგომარეობის გამოცხადება უნდა აგვარიდოს. ამ მიზნით ვქმნით დეპუტატთა გაერთიანებას, ვინც აღნიშნული სამუშაოს შესრულების ორგანიზებას საკუთარ თავზე აიღებს. ახლა მთავარია, საზოგადოებას მის მიერ დაყენებულ საკითხებზე სარწმუნო და მართალი პასუხები გაეცეს", - აღნიშნულია დეპუტატების ერთობლივ განცხადებაში. რადას დეპუტატთა  ნაწილი
უკრაინის მთავრობის გადადგომას, 16 იანვარს მიღებული კანონების შეცვლას, საპროტესტო აქციებისას დაკავებულთა მასობრივ ამნისტიას ითხოვენ.  

                                                                                   (მოამზადა თეონა რამაზაშვილმა)