უკრაინული ოპოზიციის ერთ-ერთმა ლიდერმა არსენი იაცენიუკმა პრემიერ-მინისტრის პოსტის დაკავებაზე უარი განაცხადა. ამის შესახებ განცხადება უკრაინის იუსტიციის მინისტრმა ელენა ლუკაშმა ოპოზიციის ლიდერებსა და ვიქტორ იანუკოვიჩს შორის გამართული რამდენიმესაათიანი შეხვედრის დასრულების შემდეგ გააკეთა.
ლუკაშის ცნობით, უკრაინის პრეზიდენტსა და ოპოზიციის ლიდერებს შორის მოლაპარაკებები გაგრძელდება.
ვიქტორ იანუკოვიჩი პარტია “ბატკივშინას” ლიდერს არსენი იაცენიუკს, პარტია “უდარის” ლიდერს ვიტალი კლიჩკოს და ოპოზიციის კიდევ ერთ წარმომადგენელს ოლეგ ტიაგნიბოკს მეოთხედ შეხვდა. მხარეები ქვეყანაში შექმნილი კრიზისული მდგომარეობის განმუხტვის გზებზე 4 საათის განმავლობაში მსჯელობდნენ.
შეგახსენებთ, რომ უკრაინის პრეზიდენტმა არსენი იაცენიუკს პრემიერ-მინისტრის პოსტი, ხოლო ვიტალი კლიჩკოს კი ვიცე-პრემიერის თანამდებობა 3 დღის წინ შესთავაზა.
