უკრაინის ოპოზიციური პარტია „უდარ"-ის ლიდერი ვიტალი კლიჩკო მიიჩნევს, რომ მხოლოდ ნიკოლაი აზაროვის გადადგომა საკმარისი არ არის. ამის შესახებ ვიტალი კლიჩკომ მაიდანზე წუხელ მიმდინარე აქციაზე განაცხადა.
„პროცესები წინ წავიდა - აზაროვის მთავრობა გადადგა. რომ არ ყოფილიყო მაიდანი, ეს არ მოხდებოდა. ეს კი მხოლოდ დასაწყისია“, - განაცხადა ოპოზიციის ერთ-ერთმა ლიდერმა.
მისივე თქმით, 16 იანვრის კანონების გაუქმება, რომელიც სამოქალაქო საზოგადოების თავისუფლებას ზღუდავდა „პატარა, მაგრამ, მნიშვნელოვანი ნაბიჯია“.
კლიჩკოს პარტია ასევე ითხოვს, რომ დაბრუნდეს 2004 წლის კონსტიტუცია იმისათვის, რომ ხელისუფლება ერთი პირის ხელში არ იყოს კონცენტრირებული.
პარტია „უდარ“-ის ლიდერმა გაიხსენა ვიქტორ იანუკოვიჩთან შეხვედრა და მისი შეთავაზება ვიცე-პრემიერის პოსტზე დანიშვნის შესახებ. ოპოზიციონერმა აღნიშნა, რომ ის არასდროს განიხილავს იანუკოვიჩის მთავრობაში მუშაობის საკითხს.
მანვე მიმართა ძალოვანი უწყების წარმომადგენლებს, დადგნენ ხალხის გვერდით და საკუთარი ქვეყნის მოქალაქეები დაიცვან.
ნიკოლაი აზაროვმა გადადგომის თხოვნით პრეზიდენტს გუშინ მიმართა. ვიქტორ იანუკოვიჩმა პრემიერის და მინისტრთა კაბინეტის გათავისუფლების განკარგულებას ხელი გუშინვე მოაწერა. ახალი მთავრობის დაკომპლექტებამდე, დათხოვნილი მინისტრთა კაბინეტი მოვალეობის შესრულებას გააგრძელებს.
