უკრაინაზე ზეწოლის გამო რუსეთის პრეზიდენტმა ვლადიმერ პუტინმა ანდერს ფოგ რასმუსენის კრიტიკა დაიმსახურა. ნატოს გენერალური მდივანი ამ თემაზე გამოცემა „ფიგაროს" ესაუბრა.
რასმუსენი აღნიშნავს, რომ უკრაინის მომავალი ევროკავშირთან და ნატოსთან მჭიდრო ურთიერთობებს ეფუძნება, ხოლო რუსეთის რეაქციას ამ საკითხთან მიმართებით, სამწუხაროდ მიიჩნევს.
„ეკონომიკა და უსაფრთხოება ერთმანეთთანაა დაკავშირებული. უკრაინის ასოცირებული წევრობა ევროკავშირში მნიშვნელოვანი იქნებოდა ევროატლანტიკური უსაფრთხოებისთვის. ვწუხვარ, რომ ხელშეკრულებას ხელი არ მოეწერა. ამის მიზეზი გახდა რუსეთის ზეწოლა კიევზე", - განაცხადა ანდერს ფოგ რასმუსენმა და აღნიშნა, რომ მოსკოვი ალიანსის აღმოსავლელითით გაფართოებისადმი მტრულადაა განწყობილი.
მან სამწუხარო უწოდა იმ ფაქტსაც, რომ კიევმა გადაუხვია 2008 წელს ბუქარესტის სამიტზე მიღებულ გადაწყვეტილებას, რომელიც უკრაინისა და საქართველოს ნატოში გაწევრიანებას ითვალისწინებს, თუმცა რასმუსენი დარწმუნებულია, რომ სამომავლოდ უკრაინელი ხალხი გადაწყვეტიელბას შეცვლის.
(მოამზადა ალა გრიგალაშვილმა)
