სრულიად საქართველოს კათოლიკოს-პატრიარქმა საპატრიარქოში სიმსივნით დაავადებული ბავშვები მიიღო და დალოცა. შეხვედრა ბერი ანდრიას სახელობის ფონდის და ეკის მამათა მონასტრის ბერის, ნაზარი ბასილაიას ორგანიზებით გაიმართა. შეხვედრას ფონდის წევრი, სხვადასხვა ორგანოს სიმსივნით დაავადებული 21 ბავშვი, მშობელი და მათი ექიმი ესწრებოდა, ასევე, ის მოზარდები, რომლებმაც სიმსივნე დაძლიეს და განიკურნენ.
პატრიარქის სტუმარმა პატარებმა აღნიშნეს, რომ მათთვის უწმინდესის ლოცვა-კურთხევა უმთავრესია, რაც ავადმყოფობის განკურნების იმედს აძლევს. შეხვედრაზე ის ფაქტებიც გაიხსენეს, როდესაც უწმინდესის ლოცვით და რწმენით ადამიანებმა სიმსივნის სენი დაძლიეს. კერძოდ, პატრიარქის ექიმმა ცისანა შარტავამ გაიხსენა შემთხვევა, როდესაც უწმინდესი ლიმფური ჯირკვლის სარკომით დაავადებულ პატარას დაავადების ადგილზე შეეხო და დალოცა. ცისანა შარტავას თქმით, ბავშვს ოპერაცია აღარ დასჭირვებია, იგი განიკურნა.
"მე არაფერ შუაში ვარ, მე თვითონ სამკურნალო ვარ. ყველაფერი ღვთისაგან ხდება", - აღნიშნა ილია მეორემ.
ბავშვებმა პატრიარქს საკუთარი ლექსები წაუკითხეს, სიონის ვაჟთა გუნდმა კი ხალხური სიმღერები შეასრულა.
"პირველი, რაც მინდა გკითხოთ, იმედი ხომ არ დაგიკარგავთ?! ღმერთი ძლიერია, ბევრი იკურნება და განიკურნება. ღვთის ნებით კარგად იქნებით", - მიმართა პატრიარქმა ბავშვებს.
"ბერი ანდრიას სახელობის ფონდი" 3 წლის წინ ბერი ანდრიას გარდაცვალების შემდეგ დაარსდა. ფონდი ბერი ანდრიას მშობლებმა სიმსივნით დაავადებული ბავშვების დასახმარებლად შექმნეს. ბერი ანდრია 17 წლის ასაკში კანის სიმსივნით დაიღუპა და მშობლებისგან ითხოვა, დახმარება გაეწიათ მასსავით სიმსივნით დაავადებული პატარებისთვის.
