ბათუმთან ახლოს, ე.წ. ბენზეს დასახლებაში ყოფილი ნავთობგადამამუშავებელი ქარხნის საერთო საცხოვრებლის შენობაში 30-მდე ადამიანი შეიჭრა.

როგორც შენობაში მყოფმა ნანული მახარაძემ განაცხადა, ბარაკებში მცხოვრები მოსახლეობისთვის ხელისუფლების დაპირება არ შესრულდა. მისივე თქმით, გვიან საღამოს მათთან უბნის პოლიცია იყო მისული, რომელიც გამოსახლებით დაემუქრა.

„ორი კორპუსია ბარაკებში მცხოვრები მოსახლეობისთვის აშენებული, მაგრამ განაწილების დროს ჩვენ არ შეგვხვდა. სააკაშვილიც იყო ჩამოსული, შეგვპირდა გადმოგცემთ ბინებსო, მაგრამ შემდეგ აღარ მოგვაქცია ყურადღება. ახალი ხელისუფლება რომ მოვიდა, დახმარება ვთხოვეთ, მაგრამ გვითხრეს ძველმა ხელისუფლებამ რატომ არ დაგაკმაყოფილათო, ასე დავრჩით ბინების გარეშე. ამ შენობაში არ იცხოვრება, მაგრამ ჩვენ სხვა გზა არ გვაქვს. დავანთეთ ცეცხლი, გავთბით და აქ ვაპირებთ დარჩენას, სხვა წასასვლელი არ გვაქვს",- აღნიშნა ნანული მახარაძემ.

აჭარის მთავრობის წარმომადგენლები „ბენზეს დასახლებაში" შეჭრილებთან არ მისულან. ყოფილი ნავთობგადამამუშავებელი ქარხნის საერთო საცხოვრებლის შენობა წლების განმავლობაში მიტოვებული იყო. შენობის კარები და ფანჯრები ჩამსხვრეულია, ასევე, დაზიანებულია სახურავი, რის გამოც რამდენიმე ადგილზე წვიმა ჩამოდის.