ხაიშის გამგეობის შენობაში ადგილობრივებსა და ხელისუფლების წარმომადგენლებს შორის შეხვედრა დასრულდა. შეხვედრიდან გამოსვლის შემდეგ როგორც სასჯელაღსრულების მინისტრმა სოზარ სუბარმა განაცხადა, ხელისუფლება ხალხის ნების წინააღმდეგ არასდროს წავა.
მისი თქმით, ხაიშში მცხოვრები ადამიანებისთვის ქვეყნის პრიორიტეტი მნიშვნელოვანია. შეხვედრას ადგილობრივ ხელისუფლებასთან ერთად მესტიის მაჟორიტარი დეპუტატი ვიქტორ ჯაფარიძეც დაესწრო.
მისი განცხადებით, მნიშვნელოვანია ოქროს შუალედის მოძებნა, რათა ყველას ინტერესი იქნას გათვალისწინებული.
როგორც ხაიშელები აცხადებენ, ჰუდონჰესის მშენებლობას არ დაუშვებენ.
შეგახსენებთ, რომ ჰუდონჰესის მშენებლობასთან დაკავშირებით, მორიგი მსჯელობა 6 თებერვალს განახლდება და საერთო ყრილობას სვანეთის ყველა თემის უხუცესი დაესწრება.
ხაიშელებმა წუხელ სოფლის ცენტრში კარავიც დადგეს, სადაც როგორც თავად აცხადებენ, სადღეღამისო მორიგეობა დაწესდა და კარავის აღება მხოლოდ ხელისუფლების მხრიდან ჰუდონზე უარის თქმის შემდეგ მოხდება.
