ბათუმში, თამარის დასახლებაში, „საქართველოს რკინიგზის“ ახალი საბაჟო ტერმინალი გაიხსნა. 200 ათასი ტონა მოცულობის წლიური გამტარუნარიანობის მქონე საბაჟო ტერმინალი აღმოსავლეთის ქვეყნების მიმართულებით ტვირთის გადაზიდვას უზრუნველყოფს.
თურქეთის რესპუბლიკიდან შემომავალი სატვირთო მანქანებიდან ტვირთი რკინიგზის ვაგონებზე გადაიტვირთება, საიდანაც ტრანსპორტირება განხორციელდება აზერბაიჯანის, ყაზახეთის, თურქმენეთის და სომხეთის მიმართულებით.
როგორც „საქართველოს რკინიგზის“ სამეთვალყურეო საბჭოს თავმჯდომარემ კონსტანტინე გუნცაძემ განაცხადა, პროექტი მომგებიანია საქართველოს ეკონომიკისთვის, წლიურად „საქართველოს რკინიგზას“ სამმილიონნახევარი ლარის შემოსავალი ექნება.
„ეს ყველასთვის მომგებიანი პროექტია, როგორც გადამზიდავი კომპანიებისთვის, ასევე, რკინიგზისთვის, საქართველოს ეკონომიკისთვის, ეკოლოგიისთვის, რადგანაც ეს გამოიწვევს ტრასებზე ტრაფიკის გარკვეულ განტვირთავს. ეს პროექტი მთლიანად წაადგება გადაზიდვების განვითარებას ქვეყანაში. საუბარია 200 ათასი ტონა მოცულობის წლიური გამტარუნარიანობის ტერმინალზე. აქ მოხდება ტრაილერებიდან ტვირთის გადაზიდვა რკინიგზის ვაგონებში, შემდეგ კი რკინიგზის ინფრასტრუქტურის გამოყენებით გადაზიდვა დანიშნულების ადგილამდე", - აღნიშნა კონსტანტინე გუნცაძემ.
ტერმინალის გახსნის ცერემონიალს ესწრებოდნენ ევრო-აზიური კორიდორის ქვეყნების გადამზიდავი და სარკინიგზო კომპანიების წარმომადგენლები ყაზახეთიდან, თურქეთიდან, აზერბაიჯანიდან და რუმინეთიდან. ასევე, საქართველოს ეკონომიკისა და მდგრადი განვითარების მინისტრის მოადგილე, საქართველოს რეგიონული განვითარებისა და ინფრასტრუქტურის მინისტრის მოადგილე, აჭარის მთავრობის თავმჯდომარე და სხვა საპატიო სტუმრები.
