მიუნჰენის უსაფრთხოების კომისიაზე უკრაინის საგარეო საქმეთა მინისტრი ლეონიდ კოჟარა და ოპოზიციის ლიდერი ვიტალი კლიჩკო ქვეყანაში შექმნილი პოლიტიკური მდგომარეობის გამო ერთმანეთს მწვავედ დაუპირისპირდნენ.
ვიტალი კლიჩკომ საგარეო უწყების ხელმძღვანელს სამართალდამცველთა მხრიდან ძალადობის ამსახველი ფოტოები აჩვენა. კოჟორამ კი ოპოზიციის ნაწილი ექსტრემიზმში დაადანაშაულა და ლიდერებს პასუხისმგებლობის გაზიარებისკენ მოუწოდა.
დისკუსიის შემდეგ ვიტალი კლიჩკომ მიუნჰენში პრესკონფერენცია გამართა.
"სამხედროები არც ერთ შემთხვევაში არ უნდა ჩაერივნონ ამ კონფლიქტში. თუ პრეზიდენტი საკუთარი მოქალაქეების წინააღმდეგ ჯარის გამოყენებას აპირებს, ეს მის მხრებს ძალიან მძიმე ტვირთად დაადგება. ჩვენ სამი სხვადასხვა იდეოლოგიის ლიდერი ვართ გაერთიანებული, მაგრამ ჩვენ ორი რამ გვაქვს საერთო. პირველი, უკრაინა ევროპული ოჯახის წევრ ქვეყანად მიგვაჩნია და მეორე, ყველანი ვიბრძვით ამჟამინდელი ხელისუფლების წინააღმდეგ," - განაცხადა ვიტალი კლიჩკომ.
