დღეს, ს.ს. ,,მადნეულის", კერძოდ კი შ.პ.ს. „RMG GOLD"-ის სამსახურიდან გათავისუფლებულმა 200-მდე მუშამ ბოლნისის მუნიციპალიტეტის დაბა კაზრეთში საპროტესტო აქცია გამართა. 

დღეის მონაცემებით, 2013 წლის ნოემბრის შემდეგ, კომპანია "RMG GOLD"-მა 350-მდე ადგილობრივი მუშახელი გაათავისუფლა.

მუშები კომპანიის ხელმძღვანელობას არაადამიანური სამუშაო პირობების შექმნაში, პირად შეურაცხყოფასა და უკანონო გათავისუფლებაში ადანაშაულებენ. 

აქციის მონაწილე და ,,მადნეულის" უკვე ყოფილი თანამშრომლები ამბობენ, რომ მათი გათავისუფლების მიზეზად კომპანიამ შრომის კოდექსის 37-ე მუხლი მოიყვანა და კომპანიის რეორგანიზაცია დაასახელა. 

სინამდვილეში კი როგორც გათავისუფლებულები ამბობენ, მათ უარი თქვეს ე.წ. „საყდრისის" ტერიტორიაზე სამუშაოების აღდგენის ლიცენზიის მოსაპოვებელ აქციაში მონაწილეობაზე. მათი განცხადებით, ამ ქმედებით კომპანია მომუშავეების საკუთარი მიზნებისთვის გამოყენებას აპირებდა.

,,ჩვენი წინაპრების კვალი წაგვაშლევინეს საყდრისზე, ჩემი ხელით გადამაყრევინეს სამარხებში აღმოჩენილი თავის ქალები, ჩვენ წინააღმდეგი ვიყავით და ვართ საყდრისის გახსნის, წინააღმდეგები ვართ იმ არაადამიანურად მოქცევის, როგორც გვექცეოდნენ და მოვითხოვთ ყველა გათავისუფლებული მუშა დაუბრუნდეს სამსახურს", - განაცხადა აქციის მონაწილემ და ,,მადნეულის" უკვე ყოფილმა თანამშრომელმა ზურაბ ბერიძემ.

აქციის მონაწილეებთან მივიდნენ და საკითხის გარკვევასა და მოგვარებაში დახმარება შესთავაზეს უფლებადამცველმა და არასამთავრობო ორგანიზაცია Green Fist-ის მხარდამჭერთა ჯგუფის თავმჯდომარემ ლაშა ჩხარტიშვილმა და ირაკლი წერეთელმა.

როგორც გათავისუფლებული მომუშავეები ამბობენ, მათ უკვე შექმნეს საგაფიცვო კომიტეტი და  შვიდ პუნქტიანი დოკუმენტიც, რომელსაც კომპანიას წარუდგენენ. მოთხოვნების დაუკმაყოფილებლობის შემთხვევაში, ისინი კომბინატის პარალიზებით იმუქრებიან.

"RMG GOLD"-ის ხელმძღვანელობას საგაფიცვო კომიტეტმა 7 პუნქტიანი მოთხოვნის დოკუმენტის გასაცნობად და გადაწყვეტილების მისაღებად დრო 14 თებერვლამდე მისცა.

გათავისუფლებული მუშები კი ფართო მასშტაბიან საპროტესტო აქციას უკვე 9 თებერვალს გამართავენ.

(მოამზადა ქრისტინე ფოფხაძემ)