საქართველოს სახალხო დამცველის, უჩა ნანუაშვილის განცხადებით, სახალხო დამცველთან არსებული ლაფანყურის საქმეზე მომუშავე კომისიის ანგარიშის ნაწილი შესაძლოა არ გასაჯაროვდეს. უჩა ნანუაშვილის თქმით, დასკვნა მზად დაახლოებით გაზაფხულისთვის იქნება.
"ბოლო რამდენიმე თვის განმავლობაში კომისია ძალიან აქტიურად მუშაობდა, მოეწყო შეხვედრა ათობით ადამიანთან, ხდება ფოტო, ვიდეო და სხვა სახის მასალის შეგროვება. მოწმეების დიდ ნაწილთან შეხვედრები უკვე დასრულებულია, თუმცა კვლავ რჩება გამოსაკითხი რამდენიმე პირი და დასაზუსტებელი რამდენიმე ინფორმაცია. მეორე ეტაპი, რაც ინფორმაციის ანალიზს გულისხმობს მალე დაიწყება. თუმცა კონკრეტული თარიღის დასახელება როდის დასრულდება მუშაობა გამიჭირდება. ორი თვის მანძილზე ჩვენ სავარაუდოდ შევძლებთ თავი მოვუყაროთ ამ ინფორმაციას და იმედი გვაქვს გაზაფხულისთვის უკვე იქნება გარკვეული დასკვნა", - განაცხადა სახალხო დამცველმა დღეს, ჟურნალისტებთან გამართულ შეხვედრაზე, სადაც ბოლო ერთი თვის ანგარიში წარმოადგინა.
საქართველოს სახალხო დამცველის აპარატთან შექმნილი საზოგადოებრივი საბჭო, რომელიც ლაფანყურის საქმეს სწავლობს, 11 წევრისგან შედგება, მათ შორის არიან პანკისის ხეობის უხუცესთა საბჭოს წარმომადგენლებიც.
