ქობულეთში, აღმაშენებლის ქუჩაზე რესტორან „ზევაში", 31 ივლისს მომხდარი ჩხუბის დროს სამი ადამიანის დაჭრისთვის ბრალდებულს პროკურატურამ ბრალი წარუდგინა.

როგორც აჭარის პროკურატურის უფროსმა პროკურორმა, ვლადიმერ თურმანიძემ ბათუმში ჟურნალისტებს განუცხადა, 1986 წელს დაბადებულმა გიორგი გ-მ რესტორნის ტერიტორიაზე შელაპარაკების დროს სომხეთის ორი მოქალაქე და ქობულეთის მკვიდრი დანით დაჭრა. მისივე თქმით, სისხლის სამართლის კოდექსის 19.109-ე მუხლის მესამე ნაწილის "ა" ქვეპუნქტით წარუდგინა ბრალი პროკურატურამ ბრალდებულს, რაც გულისხმობს 20 წლამდე პატიმრობას ან სასჯელის უფრო მაღალ ზომას:

„31 ივლისს ღამის საათებში ქობულეთში რესტორან "ზევას" ტერიტორაზე, ურთიერთშელაპარაკების დროს, ჩხუბისას ბრალდებულმა გიორგი გ-მ დანის გამოყენებით დაზიანება მიაყენა სამ პიროვნებას. კერძოდ, სომხეთის ორ მოქალაქეს და ერთ ქობულეთის მკვიდრს. დაზარალებულები საავადმყოფოში არიან გადაყვანილები და მათ სიცოცხლეს საფრთხე არ ემუქრება. რაც შეეხება ბრალდებულს, ის დააკავა პოლიციამ და ამჟამად მოთავსებულია დროებითი მოთავსების იზოლატორში. ბრალდებულს პროკურატურამ წარუდგინა ბრალი 19.109 მუხლის მესამე ნაწილის ა ქვეპუნქტით, რაც გულისხმობს მკვლელობის მცდელობას ჩადენილს ორი ან მეტი პირის მიმართ", - აღნიშნა ვლადიმერ თურმანიძემ.