„ენერგო-პრო ჯორჯიას“ ცნობით, 23 სოფელში ინდივიდუალური გამრიცხველიანება დასრულდა. კომპანიის ინფორმაციით, 2014 წლის 1-ლი იანვრიდან დღემდე "ენერგო–პრო ჯორჯიამ" გაამრიცხველიანა 8 235 აბონენტი, რაშიც კომპანიამ 2 058 750 ლარის ოდენობის ინვესტიცია განახორციელა. კერძოდ, ევროსტანდარტების შესაბამისი ინდივიდუალური მრიცხველები დამონტაჟდა გორის რაიონის სოფელ ტინისხიდში (510 აბონენტი), მარტვილის რაიონის სოფელ ნახუნაოში (311 აბონენტი), წალენჯიხის რაიონის სოფლე ჭალეში (382 აბონენტი), ზუგდიდის რაიონის სოფელ ნარაზენში (934 აბონენტი), ჩოხატაურის რაიონის სოფელ ბუკისციხეში (237 აბონენტი) და კიდევ 18 სოფელში საქართველოს სხვადასხვა რეგიონის მასშტაბით.

„ინდივიდუალური გამრიცხველიანება ჩვენი კომპანიისთვის ერთ-ერთი პრიორიტეტული პროექტია. ჩვენი ტექნიკური სამსახური მაქსიმალურად ცდილობს, სამუშაოები წარმართოს ეფექტურად, რაც გვეხმარება აბონენტების მომსახურების ხარისხის გაუმჯობესებაში", - განაცხადა "ენერგო-პრო ჯორჯიას" საზოგადოებასთან ურთიერთობის სამსახურის უფროსმა ავთო დვალიშვილმა.

გამრიცხველიანებასთან ერთად აქტიურად მიმდინარეობდა სარეაბილიტაციო სამუშაოებიც, რომლებიც მოიცავდა ქსელის რეაბილიტაციას, რომლის ფარგლებშიც მთლიანად შეიცვალა ამორტიზირებული სადენები ახალი სადენებით, ძველი ხის ბოძები - ახალი ბოძებით, გარემონტდა სატრანსფორმატორო პუნქტები და მნიშვნელოვნად გაუმჯობესდა ქსელის ინფრასტრუქტურა. 

კომპანია განაგრძობს გამრიცხველიანების სამუშაოების წარმოებას და 2015 წლისთვის გამრიცხველიანებული იქნება მთელი საქართველო.