ყირიმის რუსეთის ფედერაციისთვის დასახმარებლად მიმართვის კომენტირებისას, რუსეთის საგარეო საქმეთა სამინისტროს ოფიციალურმა წარმომადგენელმა, ალექსანდრე ლუკაშევიჩმა განაცხადა, რომ რუსეთი არ ერეოდა და არ ერევა უკრაინის შინაურ საქმეებში.
„მიგვაჩნია, რომ უკრაინის ხელისუფლება საკმაოდ ქმედითუნარიანია, საიმისოდ რომ პოლიტიკური კრიზისის განსამუხტავად დამოუკიდებელი გადაწყვეტილებები მიიღოს. ამ პროცესებში არ ვერეოდით და არ ჩავრეულვართ. ერთადერთი - ჩვენ შორის მიმდინარეობს მრავალვექტორიანი დიალოგი, ყველა მიმართულებით, პრაქტიკული პოლიტიკისა და ეკონომიკური ურთიერთთანამშრომლობის დროს წამოჭრილი მტკივნეული საკითხების მოსაგვარებლად.“ - გადმოგვცემს რია „ნოვოსტი“.
შეგახსენებთ, რომ სამშაბათს, ყირიმის ავტონომიური რესპუბლიკის უმაღლესმა საბჭომ მოითხოვა კონსტიტუციაში ავტონომიის შესახებ ცვლილებების შეტანა და დახმარებისა და თავდაცვისათვის რუსეთს მიმართა. ამ ინიციატივით გამოსულ დეპუტატთა ჯგუფს სათავეში უდგას ავტონომიის პარლამენტის ყოფილი სპიკერი, პარტია „ რუსკოე ედინსტვოს“ ერთერთი ლიდერი, სერგეი ცეკოვი და რეგიონალური პარტიის დეპუტატი, ვლადიმერ კლიჩნიკოვი.
„იმის გამო რომ ყირიმი, ეს რუსეთის ავტონომიაა ნაციონალობით, კულტურითა და ენით, ჩვენ, უბრალოდ, მოვალენი ვიყავით მიგვემართა რუსეთის ფედერაციისთვის“ -განაცხადა კლიჩნიკოვმა. ხოლო სერგეი ცეკოვმა გაზეთ „ვზგლიადს“ განუცხადა, რომ „მაიდანში“ გამართული აქციის დროს გამოფენილი რუსოფობიული ლოზუნგები და ორატორთა გამოსვლები გახლავთ ის მუხტი, რაც ყირიმს ასეთი ნაბიჯისკენ უბიძგებს.“
მან ასევე განაცხადა - „ ყირიმი, ეს რუსული, რუსულენოვანი და რუსული კულტურის მატარებელი ანკლავია და არაფერია უცნაური იმაში, რომ მათ რუსეთს სთხოვეს თანადგომა. ის, ვისაც ჩვენი ასეთი რეაქცია აკვირვებს, უბრალოდ, ვერ ხვდება აშკარა რეალობას.“
უკრაინის ოპოზიციური პარტიის „სვობოდას“ დეპუტატმა, ედუარდ ლეონოვმა, სეპარატისტული მოწოდებებისათვის, ყირიმის უმაღლესი საბჭოს წევრების პასუხისგებაში მიცემა მოითხოვა.
(მოამზადა მერაბ ხაჩიძემ)
