დღეს თბილისის საქალაქო სასამართლოში ე.წ. ტრაქტორების საქმეზე წინასასამართლო სხდომა გაიმართება. აღნიშნულ საქმესთან დაკავშირებით, 2 აგვისტოს მთავარმა პროკურატურამ განცხადება გაავრცელა, რომლის თანახმადაც, სისხლის სამართლის საქმე - სოფლის მეურნეობის სამინისტროსა და შპს ,,მექანიზატორის" რიგი თანამდებობის პირების მიერ დიდი ოდენობით სახელმწიფოს კუთვნილი თანხების გაფლანგვისა და სამსახურებრივი უფლებამოსილების ბოროტად გამოყენების ფაქტზე თბილისის საქალაქო სასამართლოში 31 ივლისს წარიმართა განსახილველად. „იმის გათვალისწინებით, რომ საქმეზე გამოძიება დასრულდა, აღარ არსებობს ბრალდებულთა მხრიდან მტკიცებულებათა მოპოვებაში ხელის შეშლის საფრთხე, შესაბამისად ამოწურულია ბრალდებულთა პატიმრობაში ყოფნის აუცილებლობა. ზემოაღნიშნულიდან გამომდინარე, საქართველოს მთავარი პროკურატურა თბილისის საქალაქო სასამართლოს მიმართავს შუამდგომლობით ბრალდებულების მიმართ შეფარდებული აღკვეთის ღონისძიების - პატიმრობის, გირაოთი შეცვლის თაობაზე", - განაცხადეს პროკურატურაში.
