ბათუმში მუნიციპალური ავტობუსის მძღოლები კვლავ გაფიცულები არიან. 300-მდე მძღოლი ხელფასების გაზრდასა და შპს „ბათუმის ავტოტრანსპორტის" დირექტორის გადადგომას ითხოვს.
ერთ-ერთი გაფიცული მძღოლის ვაჟა გოგელიას განცხადებით, გუშინ ბათუმის საკრებულოში პროფკავშირების წარმომადგენლებსა და მძღოლებს შორის გამართული მოლაპარაკებები უშედეგოდ დასრულდა, რის გამოც მძღოლები დღის მეორე ნახევარში შიმშილობის დაწყებას გეგმავენ.
„გაფიცვას ვაგრძელებთ, შუადღიდან შიმშილობას დავიწყებთ, კარვებს გავშლით ავტოფარეხის წინ. ჩვენი მოთხოვნა არ შეცვლილა. ვითხოვთ, დირექტორის გადადგომას და ხელფასების მომატებას", - განაცხადა ვაჟა გოგელიამ.
ბათუმში გაფიცული მუნიციპალური ტრანსპორტის მძღოლების საკითხს ინტერფრაქციული ჯგუფი შეისწავლის. ბათუმის საკრებულოს თავმჯდომარის ირაკლი ჩავლეიშვილის თქმით, ავტოტრანსპორტის დირექტორის გადაყენების საკითხი საკრებულოს პრეროგატივაა.
