მელიტონ კუხიანიძის სახელობის აჭარის სიმღერისა და ცეკვის სახელმწიფო ანსამბლში კვლავ უთანხმოებაა. ანსამბლის 60-მდე წევრი ყოფილი სამხატვრო ხელმძღვანელის თემურ ქორიძის სამსახურში დაბრუნებას ითხოს და პერმანენტულ აქციებს მართავს.
აქციის მონაწილეებს თქმით, ისინი იქამდე გააგრძელებენ აქციებს, სანამ მათი მოთხოვნა არ დაკმაყოფილდება და სამხატვრო ხელმძღვანელს პოსტზე არ დააბრუნებენ.
„სანამ თემურ ქორიძეს არ დააბრუნებენ, მანამდე ვაპირებთ აქციების გაგრძელებას. ახალ დირექტორს, ოთარ მიქელაძეს თუ არ სურს თემურ ქორიძესთან მუშაობა, თვითონ დატოვოს თანამდებობა. ვაპირებთ შიმშილობის დაწყებას", - განაცხადა მოცეკვავე თამუნა ხალვაშმა.
როგორც ანსამბლის წევრების ადვოკატმა რამინ პაპიძემ განაცხადა, აქციის ყველა მონაწილეს შრომითი ხელშეკრულებების შეწყვეტით ემუქრებიან, რაც კანონდარღვევაა.
„ეს იქნება კანონდარღვევა, რადგან ეს ადამიანები გაფიცულები არიან და ამის შესახებ შესაბამისმა დაწესებულებებმა იციან. იმის გამო,რომ ანსამბლის ახლად დანიშნულ ორ ხელმძღვანელთან აქვთ კონფლიქტი, 60 ადამიანი, რომელიც თემურ ქორიძის დაბრუნებას ითხოვს, სამსახურიდან არ უნდა გაათავისუფლონ", -განმარტა რამინ პაპიძემ.
ანსამბლის ის წევრები, რომლებიც საპროტესტო აქციაში არ მონაწილეობენ, მოცეკვავეებს ჩვეულ რეჟიმში მუშაობის გაგრძელებისკენ მოუწოდებენ.
„ხელისშემშლელი პირობების გამო რეპეტიციები არ ტარდება. თხოვნით მივმართავ თითოეულ მოცეკვავეს, ამხელა ტრადიციების მქონე ანსამბლს, ნუ დავიყვანთ დაბალ დონემდე. მოვაგვაროთ ჩვენი საკითხი და გავაგრძელოთ ჩვეულ რეჟიმში მუშაობა", - განაცხადა მოცეკვავემ და მსახიობმა მარიკა სიხარულიძემ.
ანსამბლის ორკესტრის ხელმძღვანელის ირაკლი შარაძის თქმით, უთანხმოებამ ანსამბლი ორად გაყო.
