მართლმადიდებელი ეკლესია დღეიდან, უძღები შვილის კვირიაკეს აღნიშნავს. ამასთან დაკავშირებით ყოვლადწმინდა სამების საკათედრო ტაძარში წირვას პატრიარქის ქორეპისკოპოსი, ბოდბელი ეპისკოპოსი იაკობი აღავლენს. 

უძღები შვილის შვიდეულს სხვაგვარად ხორციელ კვირასაც უწოდებენ, რომლის დროსაც ოთხშაბათი და პარასკევი სამარხვო დღეები იქნება. ხორციელ შაბათს კი, ოცდაორ თებერვალს, ტაძრებში მიცვალებულების მოსახსენიებელი მსახურება შესრულდება. 

ეკლესიებში დღეს, სახარებიდან ის ადგილი იკითხება სადაც უფალი უძღები შვილის დაბრუნებაზე საუბრობს. საკვირაო წირვაზე უძღები შვილის შესახებ იგავი მოგვითხრობს,(ლუკა 15. 11-31) თუ როგორ დაუბრუნდა მამას გაქცეული შვილი, რომელმაც მთელი თავისი ქონება გაფლანგა, მაგრამ მიხვდა თავის დანაშაულს და მამასთან მსახურად დადგომა გადაწყვიტა, მამამ კი ასეთი სინანულის გამო კვლავ შვილად მიიღო. ეს იგავი ჩვენში სინანულისა და საკუთარი ცოდვების განცდას კიდევ უფრო ზრდის. გადარჩენისა და ცხონების სურვილს აღძრავს.

ეს დიდმარხვისთვის მორწმუნეების მოსამზადებელი მეორე კვირაა. მართლმადიდებელი ეკლესია მორწმუნეების მომზადებას დიდმარხვისთვის რამდენიმე კვირით ადრე იწყებს. დიდმარხვის დაწყებას წინ, სამი კვირა უძღვის.

დიდმარხვა წელს 3 მარტს დაიწყება და 20 აპრილს, უფლის აღდგომის დღესასწაულზე დასრულდება.