ყარსი-ახალქალაქის სარკინიგზო მაგისტრალის მშენებლობის შედეგად სამშენებლო დერეფანში მოქცეულ კერძო მიწის ნაკვეთებს გამოისყიდიან.

გამოსყიდვასთან დაკავშირებული მომსახურების შესაძენად გამარტივებული ელექტრონული ტენდერი გამოცხადდა. კომპანია, რომელიც ტენდერში გაიმარჯვებს, მიწის ნაკვეთის ღირებულების საკომპენსაციო თანხის დადგენასთან ერთად, კარტოფილის ერთი წლის მოსავლის ღირებულებაც უნდა გაითვალისწინოს.

„კარტოფილის მოსავლის საკონპენსაციო თანხას ყველა მობინადრე აიღებს მიუხედავად იმისა,  არსებობს თუ არა ასაღები მოსავალი. ეს განპირობებულია იმ გარემოებით, რომ პროექტის  ფარგლებში მიმდინარე სამშენებლო სამუშაოების გამო, ამჟამად შეუძლებელია კარტოფილის მოსავლის არსებობისა და ოდენობის დადგენა", - აღნიშნულია მთავრობის განკარგულებაში.

შეგახსენებთ, რომ სარკინიგზო დერეფნის მშენებლობა, რომელმაც აზერბაიჯანი საქართველოს გავლით თურქეთთან უნდა დააკავშიროს 2007 წელს დაიწყო. საქართველოს ტერიტორიაზე მარაბდა-კარწახის 153 კმ-იანი მონაკვეთის რეკონსტრუქცია და ახალქალაქიდან თურქეთამდე 29 კმ-იანი გზის მონაკვეთის მშენებლობა იგეგმება.