გურჯაანის მუნიციპალიტეტში სურსათის ეროვნული სააგენტოს კახეთის რეგიონული სამმართველოს სპეციალისტზე ფიზიკური ძალადობა განხორციელდა. სურსათის ეროვნული სააგენტოს ინფორმაციით, მათ თანამშრომელზე ძალადობა მაშინ განხორციელდა, როდესაც ის სამსახურებრივი უფლებამოსილებას ასრულებდა.

მათივე ცნობით, სააგენტოს სპეციალისტმა, ჯიმშერ ოსიაშვილმა სურსათის სარეალიზაციო ობიექტში მონიტორინგის განხორციელებისას გამოავლინა ეტიკეტირების წესის დარღვევა, რომელიც საქართველოს კანონმდებლობით იწვევს ბიზნესოპერატორის დაჯარიმებას 400 ლარის ოდენობით.

„ბიზნესოპერატორი არ დაეთანხმა დაჯარიმებას, თავს დაესხა სპეციალისტს, რომელიც უგონო მდგომარეობაში, ყბის ძვლის მოტეხილობით გადაიყვანეს საავადმყოფოში", - ნათქვამია სურსათის ეროვნული სააგენტოს ინფორმაციაში.