„მე დღეს უკრაინელი ვარ“, - ამ სლოგანით ქუთაისში უკრაინელი ხალხის მხარდამჭერი აქცია გაიმართა.
მედიის, არასამთავრობო ორგანიზაციებისა და პოლიტიკური წრეების წარმომადგენლები ჯერ ქალაქის ცენტრალურ მოედანზე შეიკრიბნენ, ხოლო შემდეგ პარლამენტის შენობასთან გადაინაცვლეს. პარლამენტის წინ აქციას უმცირესობის დეპუტატები შეუერთდნენ.
აქციის მონაწილეთა განცხადებით, ვლადიმერ პუტინს უკრაინელი ხალხის ბედის განკარგვის უფლება არ უნდა მისცენ, ხოლო ქვეყნის ხელისუფლებამ მიმდინარე მოვლენებთან დაკავშირებით მკაფიო პოზიცია უნდა დააფიქსიროს.
„ეს არის უკრაინელი გმირი ხალხის ბრძოლა. თუ უკრაინელები გაიმარჯვებენ, ეს კარგი იქნება ჩვენთვისაც,“ - აცხადებს უმცირესობის დეპუტატი დავით დარჩიაშვილი.
შეგახსენებთ, რომ უკრაინაში, მაიდანზე საპროტესტო აქციები ორი თვეა მიმდინარეობს. საზოგადოება რუსეთისა და ევროინტეგრაციის მომხრეებად არის დაყოფილი. გუშინ, გვიან ღამით კი, უკრაინის ხელისუფლებამ მოქალაქეთა წინააღმდეგ ძალა გამოიყენა, რასაც მსხვერპლი მოჰყვა.
