ავტობუსის მძღოლების გაფიცვის მეცხრე დღეს შპს „ავტოტრანსპორტის" დირექტორი, გია ლორია დაკავებული თანამდებობიდან გადადგა. მან „ბათუმელებთან" საუბარში აღნიშნა, რომ განცხადება გათავისუფლების შესახებ უკვე დაწერა.
„მძღოლები მართული იყვნენ გარე პოლიტიკური ძალების მიერ, შემეცოდა ხალხი, ისინი ამბობდნენ, რომ ჩემ გამო არ მუშაობდნენ, ამიტომაც მივიღე გადაწყვეტილება წასვლის შესახებ", - განაცხადა გია ლორიამ.
ამ წუთებში აჭარის პროფკავშირების ხელმძღვანელი გაფიცულ მძღოლებს განცხადებას აცნობს და რამდენიმე წუთში გახდება ცნობილი, როდის აღდგება ქალაქში ავტობუსების მოძრაობა.
„ავტოტრანსპორტის" მძღოლები ხელფასის მომატებისა და დირექტორის გადადგომის მოთხოვნით ცხრა დღის წინ გაიფიცნენ. ქალაქში ავტობუსების მოძრაობის შეწყვეტას მოსახლეობის უკმაყოფილება მოჰყვა.
(მოამზადა ლილუ მიროტაძემ)
